Menntun

menntun er máttur

Það eru margir möguleikar fyrir þá sem vilja stunda starfsnám í heimi íslenska hestsins. Mörg lönd hafa sín eigin menntakerfi sem landssamtök íslenska hestsins styðja. Boðið er upp á námskeið og fyrirlestra, oft í samvinnu við landssambönd annarra landa.

háskólanám

Háskólinn á Hólum býður upp á BS nám í hestafræðum þar sem hagnýtri reynslu er tvinnað saman við námið. Á hverju ári kemur fjöldi erlendra nema til að stunda nám við Hólaskóla og fara svo að námi loknu aftur á heimaslóðir til að kenna og temja. Að jafnaði eru erlendir nemendur 30% þeirra sem stunda nám í hestafræðum. Skólinn er ásamt Félagi tamningamanna drifkraftur í menntun tengdri íslenska hestinum.

eitthvað fyrir alla

Á síðustu árum hafa nokkrir framhaldsskólar boðið upp á nám tengt hestum sem hluta af námsskrá sinni og þannig fært þessa merkilegu íþrótt og gefandi lífsstíl nær nemendum.

Opinberir aðilar, skólar og einkaaðilar bjóða einnig upp á fjölda námskeiða og fyrirlestra árið um kring. Íslenskir hestamenn eru að jafnaði áhugasamir um að bæta tækni og auka þekkingu sína og eru námskeið tengd íslenska hestinum því mikið sótt.